РӮҒАНҶӮШӢ

Маҳсулоти зарурӣ:

Нони хушк;

Дӯғ;

Равғани зард;

Пиёз;

Кабудӣ.

Тарзи таҳия:

Рӯғанҷӯшӣ хӯроки мардуми кӯҳистон аст. Одатан дар ҳар хонадон нонҳои пора зиёд ҷамъ мешаванд. Кадбонуи хуб ин нонҳоро бояд тоза хушконад. Дар зарфе 2–3 литр дуғ рехта, нонҳои хушкро ба он илова карда, дар оташи муътадил бо қошуқи чӯбӣ муддати 5 – 6 дақиқа онро кофтан зарур аст, то нонҳо нағз мулоим шуда, ҳаҷман на майда ва калон шаванд. Сипас, нонҳои пухтаро дар табақ мекашанд. Дар болояш кабудӣ (пиёзи сабз, гашниз, шибит, райҳон) реза карда, мепошанд. Пиёзро низ борик реза карда, болои кабудиҳо мерезанд. Мобайни табақро дар шакли доирача каме холӣ мегузоранд. Равғани зардро доғ карда, болои маҳсулот мерезанд.

ТЕЗОБА

Маҳсулоти зарурӣ:

Оби сӯзон -1 коса;

Қаланфури тунд 1–2 дона;

Кабудиҳои хушк (гашниз, шибит, райҳон, пудина ва ғ.);

Каме намак.

Тарзи таҳия:

Тезоба хӯриши қадимии мардуми тоҷик аст. Модарон вақте ки дар танӯр нон мепухтанд, тезобаро дар зарфи 2–3 дақиқа тайёр мекарданд.

Дар табақ оби сӯзонро рехта, каме намак ҳамроҳ мекунанд ва қаланфур мешаканд. Аз кабудиҳои хушкшуда андаке илова карда, онро омезиш медиҳанд. Гирдачаҳои гарми танӯриро ба ин хӯриш тар карда, тановул намудан лаззати нотакрор дорад.

ПИРОГИ ОСОНПАЗ

Маҳсулоти зарурӣ:

Ҷурғот - 1 истакон;

Шакар - 1 истакон;

Маргарин (ё равғани офтобпараст) - 250 г;

Тухм – 4 адад;

Орд - 1,5 истакон;

Моддаи ковоккунанда – 1 баста

Тарзи таҳия:

Тухмҳоро бо шакар лат зада, баъд равған ва ҷурғотро ҳамроҳ мекунанд. Сипас, орд илова карда, болои он моддаи ковоккунанда мепошанд. Мувофиқи табъ андаке ванилин ҳамроҳ карда, мекобанд. Ба варақи тафдон каме равған молида, маҳсулоти омодакардаро ба он мекӯчонанд ва дар ҳарорати 200 дараҷа муддати 30 дақиқа мепазанд.

Баъди андаке хунук шудани пирог онро ҳар кас метавонад мувофиқи табъ ороиш диҳад. Болои он асал молида, бо чормағз, ё хокаи қанд ва ё бо шоколади гарм рӯи пирог­ро ороиш додан мумкин аст.

Таомнома аз Моҳрухсор Сафиева