Афсаре сафдар

Исми Гул Маҳбуба дар доираи ноширону журналистон ва мақомоти корҳои дохилии кишвар хуб ошност. То ба маснади баланди роҳбарӣ расидан, бо заҳмати софдилонаву содиқона тавонист, ки миёни ҳамсафону ҳаммаслакон ҷойгоҳи хоссаи хешро пайдо намояд.

Бо дидани се ситораи бузурги сари китфони ин афсари сафдар касро беихтиёр ифтихор боло мегирад, ки имрӯз бонувони тоҷик қодиранд, то чунин мартабаи баландро дар мақомоти қудратии кишвар сазовор гашта, хидматҳои мондагорро барои наслҳои имрӯзу фардо ба ҷо биёранд.

Гул Маҳбуба Талбӣ рутбаи полковники милитсияро доро буда, ҳамчун сардори шуъбаи сомонаи расмии дастгоҳи вазири корҳои дохилии Ҷумҳурии Тоҷикистон ифои вазифа менамояд. Хатмкардаи факултаи филологияи Донишгоҳи миллии Тоҷикистон ва факултаи ҳуқуқшиносии Академияи Вазорати корҳои дохилии Ҷумҳурии Тоҷикистон аст. Дар вазифаҳои гуногуни Вазорати корҳои дохилии Ҷумҳурии Тоҷикистон фаъолият бурдааст. Аз ҷумла, ҳамчун ёрдамчии сардори ситоди оперативии қисми навбатдории раёсати нозиротӣ-ташкилӣ, журналист-хабарнигори маркази матбуоти раёсати нозиротӣ-ташкилӣ, ҳуқуқшинос-мушовири калони хадамоти муҳоҷират, сарнозири раёсати ҳамкориҳои байналмилалӣ, сардори шуъбачаи вобаста ба сомонаи Вазорати корҳои дохилӣ дар шабакаи интернети дастгоҳи вазири корҳои дохилӣ, мушовири калони вазир оид ба корҳои маданӣ-маънавӣ ва фарҳангию фароғатӣ фаъолият намудааст.

Дар масири эҷод қадамҳои нахустинро аз соҳаи журналистика оғоз бахшида, чанд муддат дар Донишгоҳи миллии Тоҷикистон ва аз соли 1998 дар рӯзномаи «Ҷавонони Тоҷикистон» фаъолият бурдааст. Дар фасеҳу равон гардидани қалам, ба масъала аз чанд равзана назар афкандану диди нав доштанро аз устодаш Давлат Назрӣ (ҳоло сафири фавқулода ва мухтори Ҷумҳурии Тоҷикистон дар Украина), ки он овон сармуҳаррири рӯзномаи мазкур буд, омӯхтааст. Дар радифи журналистони шинохтаи кишвар фаъолият бурдан барояш мактаби бузурги таҷриба буд.

Ба мақомоти интизомии кишвар пайвастан барои бону Маҳбуба орзуи дерин буд, зеро ба нақли бобои қаҳрамонаш, ки иштирокдори Ҷанги Бузурги Ватании солҳои 1941–1945 буд, ҳамроҳ бо ҳамяроқони хеш мудом аз шуҷоату матонати ҷанговарон нақлҳо мекарданд, тинати баҳодуронаи ӯро сӯи низому тартибот моил сохтанд.

Маҳбуба пайваста аз беназмиву номураттабӣ парҳез меҷуст ва ин буд, ки соли 2001 ба мақомоти корҳои дохилии ҷумҳурӣ пайваст. Полковники мустаъфӣ Талбак Камолов дар ин ҷода ӯро пайваста ташвиқу дастгирӣ мекард.

Тули фаъолияти хизматӣ полковники милитсия Гул Маҳбуба даҳҳо хабару гузориш, мақолаву очерк, китобу маҷалла ва филмҳои ҳуҷҷатиро оид ба фаъолияти кормандони мақомоти корҳои дохилӣ дар мубориза бо ҷинояткорӣ ва пешгирии ҳуқуқвайронкунӣ таҳия ва таълиф намудааст. Дар ин росто, ҷиҳати баланд бардоштани фарҳангу маънавиёт, таъмини суботу оромӣ ва тарбияи ҳарбӣ-ватандӯстии насли ҷавон дар шабакаҳои иҷтимоӣ низ пайваста хабару гузоришҳо менигорад.

Ӯ, агарчи бонуи хонадон ва модар аст, дар матонату далерӣ мисли мардон қавӣ, масъулиятшинос асту мушкилнописанд. Дастуру супоришҳои роҳбарияти Вазоратро фавран ва бо сифат сомон дода, аз уҳдаи душвортарин вазифаҳо бо сарфарозӣ мебарояд. Хислати наҷибаш он аст, ки дар чунин ҳолатҳо кормандонро аз ғояти ҳаяҷон ба оромӣ раҳнамун сохта, онҳоро ба неруи хеш муътақид месозад.

- Фаъолият бурдан дар мақомоти ҳифзи ҳуқуқ душвориҳои зиёд дорад ва на ҳар кас ба реҷаи корӣ, интизоми хизматӣ, ҳолати пурзӯри махсус (казарма), навбатдорӣ ва дигар хусусиятҳои хосси мақомоти корҳои дохилӣ тоб меорад. Барои дар мақомоти ҳифзи ҳуқуқ кор кардан шахс бояд иродаи оҳанин, ҳисси баланди масъулиятшиносӣ ва нангу номуси ватандорӣ дошта бошад. Тавре шоир фармудааст:

Бозуи қавӣ, иродаи мустаҳкам,

Дил гарм варову сардӣ дар сар бошад.

Хушбахтона, ҷавонмардони далеру шуҷоъ - кормандони милитсия ин рисолати бузургро бо сарбаландӣ иҷро менамоянд. Агарчи бонувон дар радифи мардон дар як саф фаъолият мебаранд, аз рӯи оини ҷавонмардӣ бо дастуру супоришҳои фарзанди фарзонаи миллати тоҷик, Президенти Ҷумҳурии Тоҷикистон муҳтарам Эмомалӣ Раҳмон дар ин самт ба бонувон имтиёзу сабукиҳо дода шудаанд. Занону духтароне, ки дар мақомоти корҳои дохилӣ, ҳамчунин, дар Академияи ВКД, Коллеҷи милитсия (бо қароргоҳ дар шаҳри Кӯлоб), Коллеҷи техникӣ-оташнишонӣ дар шаҳри Данғара кору таҳсил мекунанд, аз дастгириҳои вазири корҳои дохилӣ генерал-полковники милитсия Раҳимзода Рамазон Ҳамро бархӯрдоранд, хосса духтарону писарони ятиму бепарастор ва фарзандони кормандони ҳангоми адои хизмат фавтида, ки баъди хатми муассисаҳои болозикр бо ҷойи кор таъмин мегарданд, - мегӯяд бонуи афсар.

Фаъолияти ин бонуи низомӣ дар танзиму тадвини маводҳои сомона ҳанӯз аз соли 2008 шуруъ гардид, ки он айём ӯ дар хадамоти муҳоҷирати Вазорати мазкур ҳамчун ҳуқуқшинос-мушовири калон фаъолият мекард ва бо супориши роҳбарият сомонаи хадамоти мазкурро ташкил ва дар ин самт таҷриба ҳосил намуд. Соли 2012 бо ташаббуси вазири корҳои дохилии ҷумҳурӣ сомонаи расмии Вазорат таъсис ёфт ва ӯ дар ин ҷода низ фаъолияти густурдаро ба роҳ монд.

Гул Маҳбуба бо нишони Аълочии милитсия ва Аълочии матбуоти Тоҷикистон қадр гардида, барои зоҳир намудани маҳорати баланди касбӣ аз ҷониби роҳбарияти Вазорати корҳои дохилии ҷумҳурӣ бо медалҳои Барои хизматҳои шоён, дараҷаҳои I, II, III, Садоқат, Милитсияи Тоҷикистон, Барои саҳми арзанда дар ҳифзи тартиботи ҷамъиятӣ сазовор шудааст.

Бо Фармони Президенти Ҷумҳурии Тоҷикистон 30-юми августи соли 2022 ба гирифтани мукофоти давлатӣ - Ифтихорномаи Ҷумҳурии Тоҷикистон шарафёб гаштааст.

Ситора АШӮРОВА