12 КАРАТ ЧЕМПИОН

Дар саҳни ҳавлии мактаби дурдасттарин деҳаи Дихои ноҳияи Мир Сайид Алии Ҳамадонӣ духтарони 16-17 сола ба найза ва гулӯлапартоӣ машғул буданд. Мавлуда Асламова аз нуқтаи муайян гулӯларо ҳаво медоду Матлуба ва Санавбару Хайриннисо назора мекарданд.

Файзулло Исмоилов, мураббии мактаби варзишии бачагонаи бахши ҷавонон варзиш ва сайёҳии ноҳия ва омӯзгори фанни тарбияи ҷисмонии мактаби таҳсилоти миёнаи умумии рақами 40-и деҳаи Дихои ҷамоати деҳоти Қаҳрамон гуфт, ки серкориву тараддудҳои мо барои мусобиқаи навбатии ҷумҳуриявӣ мебошад, ки шогирдони ман дар даври минтақавӣ оид ба гулӯла ва найзапартоӣ ҷойҳои аввалро соҳиб шуда, ҳуқуқи иштирок ба мусобиқаи ҷумҳуриявиро соҳиб шуданд. Онҳо бори нахуст дар чунин мусобиқаҳо иштирок намуда, натиҷаи дилхоҳ ба даст оварданд.

Бо Мавлудаи варзишгар ҳамсуҳбат мешавам. Ӯ дар мусобиқаҳои ҷумҳуриявии варзиши сабук оид ба гулӯла ва найзапартоӣ дар давоми солҳои 2008 - 2013 соҳиби 12 медали тилло, 10 медали нуқра ва 9 медали биринҷӣ гаштааст. Мавлуда танҳо соли 2012 дар мусобиқаҳои ҷумҳуриявии варзиши сабук дар намудҳои гулӯла ва найзапартоӣ соҳиби 2 медали тилло ва 1 медали нуқра гардид. Моҳи феврали соли 2013 низ дар қувваозмоии ҷумҳуриявӣ соҳиби ду медали нуқра шуд. « Сабаби асосии ба ин варзиш рӯ овардани ман шаш карат чемпиони ҷумҳурӣ гаштани Ҳангомаи Абдуғаффор дар намуди дискандозӣ мебошад. Ӯ аз мо як сол пештар таҳсил мекарду дар мусобиқаҳои ҷумҳуриявӣ иштирок намуда, медали тилло гирифта омад. Ин нишондиҳандаҳо моро руҳбаланд мекард ва шавқу ҳавасамонро ба варзиш зиёдтар месохт. Афсӯс, ки Ҳангомаи Абдуғаффор чанд сол шарафи варзиши ноҳия ва вилоятро ҳимоя карду волидайн нагузоштанд, ки ӯ таҳсилро дар мактаби олӣ давом диҳад. Ба шавҳар баромад», –мегӯяд Мавлуда. –Аз он шодам, ки бо дастгирии устодам Файзулло Исмоилов зодмандонам розӣ шуданд, ки баъди хатми мактаби миёна таҳсилро дар донишкада давом диҳам, –илова менамояд ӯ.

Файзулло Исмоилов ёдовар мегардад, ки то чемпиони олимпӣ шудани Мавзуна Чориева алоқамандони ин намудҳои варзиш дар байни духтарони мактабхон зиёд набуд.

Баъди мушоҳида ва таҳлил метавон зикр сохт, ки дар ноҳия таҳкурсӣ барои омодасозии бонувони варзишгар мавҷуд аст. Танҳо шароитро хубтар намудану сарпараст пайдо кардан зарур аст. Дар чунин ҳолат Мавзунаҳои дигареро дар самти варзиши сабук ва дигар намудҳо метавон ба майдон овард.

Билоли Шамс,